Konceptimi i njohjes në botën islame

Abstract

Ndërsa fakti nëse ekziston apo jo një epistemologji islamike e qashtër dhe e lëvruar në një mënyrë sistematike, vijon të mbetet ende edhe sot dhe gjithë ditën një çështje e hapur, ekzistenca në filozofinë islame e argumenteve, e çështjeve dhe e problemeve të ndryshme epistemologjike, është një fakt i pamohueshëm; sikundërse shfaqet i pamohueshëm edhe fakti se të këtilla argumente, çështje dhe problematika janë trajtuar sipas një pamësie dhe drejtimi të ndryshëm nga ata të ndjekur nga mendimi filozofik perëndimor. Pikërisht kjo është, madje, edhe një nga arsyet që lëvizin pas përpjekjeve për të ngërthyer dhe kuptuar çështjet dhe problemet themelore të epistemologjisë islame sipas pikëvështrimit dhe sipas konceptualizimeve të filozofisë islame. Natyrisht, të tilla përpjekje janë më se të vlefshme dhe meritojnë të gjithë vëmendjen dhe mbështetjen tonë; e megjithatë, nuk mund të mos sjellim në vëmendje se të këtilla përpjekje mund të jenë të frytshme vetëm në rast se do të ndërmarrim një analizë të përpiktë jo vetëm të çështjeve dhe problemeve në fjalë, por, më së pari dhe në mënyrë të veçantë, të përkufizimeve të sakta dhe të përpikta të koncepteve që lëvizin pas tyre dhe me të cilat operojmë gjatë trajtimit të tyre