کەلەپوور لە شیعری نوێی کوردیدا: خوێندنەوەی بەرهەمی کاکەی فەللاح بە نموونە

Abstract

کەلەپووری نه‌ته‌وه‌یی هەمیشە سەرچاوەیەکی گرنگ بووە بۆ دەوڵەمەندکردنی ئەزموونى شاعیرانی نوێی کورد. ئەمەش لەو باوەڕەیانەوە سەرچاوەى­گرتووە کە لە دووتوێی کەلەپووردا کۆمەڵێک لایەنی دەروونی و کۆمەڵایەتی و ڕۆشنبیری و فیکری و سیاسی و تەنانەت پەروەردەیی گەلی کورد ڕەنگی­داوەتەوە و ئەو زانیاریانەش ڕەگێکی قووڵیان لە ناو گەلدا داکوتاوە و بە زمانێکی سادە دەربڕاون و شەقڵی نه‌ته‌وه‌ییان وەرگرتووە. کاکەى فەللاحیش وەکوو یەکێک لە شاعیرە نوێخوازەکان لە گرنگیی ئەم سامانە نەتەوەییە گەیشتووە و هەوڵی‌داوە بەپێی پێویستی پەیام و تاقی‌کردنەوە شیعرییەکانی سوود لە به‌شە جیاوازەکانی کەلەپوور (پەندی پێشینان، ئەفسانە، شیعر، داستان و گۆرانی، چیرۆک، داب‌ونەریت و هتد) وەربگرێت و لە ڕێگەیانەوە سەردەمەکەى خۆی بە ڕابردووەوە گرێ‌بدات و ئەو ڕاستییە بەرجەستەبکاته‌وه‌ که‌ ئێستا ئه‌ڵقەى پێکەوە گرێ‌دانی ڕابردوو و ئایندەیە. بۆ ئەم مەبەستە، بە پێویستمان زانی لەم توێژینەوەیەماندا، کە لە ژێر ناوی «کەلەپوور لە شیعرى نوێی کوردیدا: شیعرەکانی کاکەى فەللاح بە نموونە»ـیە، هه‌وڵ‌بدەین چۆنێتی و چەندێتیی مامەڵەکردنى شاعیر لەگەڵ کەلەپووری نه‌ته‌وه‌ییدا دەست‌نیشان­ بکەین.